មនុស្សស្លាប់ដោយសារតែបាតុកម្មក្នុងប្រទេសបេរ៉ូបានកើនឡើងដល់២២នាក់ហើយ ។ បាតុកម្មដោយសារតែប្រធានាធិបតីបណ្តោះអាសន្នដែលទើបតែងតាំងថ្មី លោកស្រី Dina Boluarte ច្រានចោលការអំពាវនាវឲ្យចុះចេញពីតំណែង ។
មន្ត្រីបានថ្លែងថា បាតុករ២នាក់បានស្លាប់ក្រោយប៉ះទង្គិចជាមួយប៉ូលិសនៅកណ្តាលទីក្រុង បេរ៉ូ កាលពីថ្ងៃទី១៧ ខែធ្នូ ឆ្នាំ២០២២ នាំឲ្យចំនួនជនបាត់បង់ជីវិតកើនឡើង២២នាក់ ស្របពេលដែលបាតុកម្មបានផ្ទុះឡើងនៅពាស់ពេញទីក្រុងតែម្តង ។
លោកស្រី Boluarte បានច្រានចោលការលាលែងពីតំណែង ដោយលោកស្រីលើកឡើងថា ការណ៍នេះមិនអាចបញ្ឈប់អំពើហិង្សាបានទេ ។ លោកស្រីបន្តថា នឹងធ្វើដំណើរទៅកាន់ទីតាំងបាតុករធ្វើបាតុកម្មខ្លាំងក្លានោះដើម្បីថ្លែងផ្ទាល់មាត់ជាមួយក្រុមបាតុករ ។
អំពើហិង្សាបាននាំឲ្យរដ្ឋមន្ត្រី២រូបរបស់លោកស្រី Boluarte លាលែងពីតំណែង ។ រដ្ឋមន្ត្រីអប់រំ និងរដ្ឋមន្ត្រីវប្បធម៌បានប្រកាសលាលែងតាមប្រព័ន្ធ ធ្វីថើ ។
ចាប់តាំងពីដើមខែធ្នូ បាតុកម្មបានផ្ទុះឡើង ក្រោយពីការបណ្តេញអតីតប្រធានាធិបតី Pedro Castillo ចេញពីតួនាទី ។
តុលាការកំពូលប្រទេសបេរ៉ូបានបញ្ជាឲ្យឃុំឃាំងលោក Castillo នៅក្នុងគេហដ្ឋានរយៈពេល១៨ខែ ។
អតីតកាលធ្លាប់ជាគ្រូបង្រោនអាយុ៥៣ឆ្នាំត្រូវបានគេចោទប្រកាន់ និងចាប់ខ្លួនប៉ុន្មានម៉ោងបន្ទាប់ពីលោកបានព្យាយាមរំលាយសភាបេរ៉ូ ។ ការចាប់ខ្លួននេះបាននាំឲ្យបាតុកម្មឈានដល់ការបាត់បង់អាយុជីវិតមនុស្សកើតឡើង ។ មកទល់ពេលនេះ មនុស្សច្រើនសិបនាក់ទៀតបានរងរបួស ក្រៅពីស្លាប់២២នាក់ ។
ព្រលានយន្តហោះភាគខាងត្បូងបេរ៉ូ បានបិទទ្វារក្រោយភ្នាក់ងារអាកាសចរ CORPAC ប្រទេសនេះបានប្រកាសថា អាកាសយានដ្ឋានបានប្រឈមទៅនឹងការលួចប្លន់ និងអគ្គិភ័យកាលពីព្រលប់ថ្ងៃទី១៦ ខែធ្នូមកនោះ ។
លោក Pedro Castillo បានប្រកាន់ជំហររឹងមាំថា គាត់មិនបាន ប្រព្រឹត្តអំពើឧក្រិដ្ឋ ក្បត់ ឬក៏ជាឧទ្ទាមអ្វីនោះឡើយ ។ គាត់បានឡើងកាន់តំណែងក្នុងខែមិថុនា ឆ្នាំ២០២១ ។ លោកស្រី Boluarte បានស្បថចូលកាន់តំណែងជាប្រធានាធិបតីបណ្តោះអាសន្នភ្លាមៗក្រោយលោក Castillo ត្រូវបានតុលាការចោទប្រកាន់ ។
ក្រុមបាតុករបានទាមទារសភាឲ្យបិទទ្វាររដ្ឋាភិបាលបេរ៉ូសិន ហើយឆ្ពោះទៅកាន់ការបោះឆ្នោតសកលនៅឆ្នាំក្រោយ ។
ការបោះឆ្នោតមួយរបស់អង្គនីតិបញ្ញត្តិបេរ៉ូកាលពីថ្ងៃទី១៧ ខែធ្នូ ដើម្បីអនុម័តឲ្យការរៀបចំបោះឆ្នោតថ្នាក់ជាតិប្រព្រឹត្តទៅនៅក្នុងឆ្នាំ២០២៣នោះ មិនទទួលបានសំឡេងគាំទ្រពីរភាគបីនោះឡើយ ។ ដូច្នេះ ការបោះឆ្នោតសកលគឺនៅតែប្រព្រឹត្តទៅរហូតដល់ឆ្នាំ២០២៦ដដែល ពេលដែលអណត្តិ៥ឆ្នាំរបស់ Castillo ត្រូវបានបញ្ចប់ ។
ប៉ូលិស ព្រមទាំងកម្លាំងប្រដាប់អាវុធបានថ្លែងការណ៍រួមគ្នាប្តេជ្ញាគោរពរដ្ឋធម្មនុញ្ញ ដោយហៅការប៉ុនប៉ងរំលាយសភារបស់លោក Castillo គឺជាការចង់ធ្វើរដ្ឋប្រហារ ៕ ប្រែសម្រួល៖ ថាច់ យ៉ាត
