អាចចាត់ទុកបានថាជាការសាងប្រវត្តិសាស្ត្រមួយដ៏អស្ចារ្យសម្រាប់វិស័យកញ្ញាឯកនៅកម្ពុជាក្រោយពីក្មេងស្រី២រូបដែលជាបេក្ខភាពតំណាងឲ្យកម្ពុជាចេញទៅចូលរួមប្រកួតកម្មវិធីសម្រស់នៅប្រទេសថៃ ដណ្តឹមបានមកុដទាំង២រូបតែម្តង ដោយឃឿន ប៉ូលីកា អាចដណ្តើមបានជ័យលាភីម្ចាស់មកុដតែម្តងពីកម្មវិធី Miss Pre Teen International 2023 ខណៈដែល ឌៀប សូហ្វីរ៉ា ឈ្នះតំណែងលំដាប់រងទី២ពីកម្មវិធីប្រកួតសម្រស់ Little Miss Junior Idol 2023 ។
នេះជាមោទនភាពសម្រាប់វិស័យកញ្ញាឯកនៅកម្ពុជា ខណៈដែលក្រុមហ៊ុនទើបនឹងបញ្ចូលបេក្ខភាពតំណាងពីកម្ពុជាលើកដំបូងប៉ុណ្ណោះប៉ុន្តែទទួលបានលទ្ធផលល្អ ។ ឃឿន ប៉ូលីកា និង ឌៀប សូហ្វីរ៉ា ធ្វើបានយ៉ាងល្អនៅលើឆាកប្រកួតចាប់តាំងពីថ្ងៃដំបូង នៃការបង្ហាញមុខ ដែលសូម្បីតែការរៀបចំខ្លួន ឈុតរាត្រីសមោស ឈុតតំណាងជាតិក៏ទទួលបានការកោសរសើរខ្លាំងពីសំណាក់ទស្សនិកជនទាំងក្នុងនិងក្រៅប្រទេស ដែលឆ្លុះបញ្ចាំងពីការត្រៀមខ្លួនរួចជាស្រេច និងបង្ហាញពីភាពហ្មត់ច់ និងភាពចាស់ទុំជាមួយវិស័យកញ្ញាឯក បន្ថែមពីលើរូបសម្រស់សមត្ថភាព ទេពកោសល្យដែលក្មេងស្រីពីកម្ពុជាមាន ហើយតំណែងនេះពិតជាស័ក្កិសមសម្រាប់ពួកគេ ។
ក្រៅពីការទទួលបានតំណែងទាំងនេះពួកគេក៏បានឈ្នះពានរង្វាន់លើឈុតរាត្រីសមោសស្អាត ខណៈសូហ្វីរ៉ាបានឈ្នះពានដើរបង្ហាញម៉ូតល្អបំផុតផងដែរ ។ ដូចទៅនឹងការអះអាងរបស់ពួកគេប្រកបដោយទំនុកចិត្តថានឹងព្យាយាមឲ្យអស់ពីលទ្ធភាពក្រោយពីសំងំធ្វើការហ្វឹកហាត់ និងត្រៀមខ្លួនជាច្រើនខែកន្លងមក ។
គួរបញ្ជាក់ដែរថា ឌៀប សូហ្វីរ៉ា និង ឃឿន ប៉ូលីកា បានចាកចេញពីកម្ពុជាកាលពីថ្ងៃទី០៤ខែមករាឆ្នាំ ២០២៣នេះដើម្បីទៅចូលរួមប្រកួតក្នុងកម្មវិធីសម្រស់២ផ្សេងគ្នានៅប្រទេសថៃដែលត្រូវបានរៀបចំដោយក្រុមហ៊ុនតែមួយ ។ ទាំងរូបសម្រស់ សមត្ថភាព ទេពកោសល ដែលក្មេងស្រីពីកម្ពុជា ២រូបនេះមាន បាននិងកំពុងតែធ្វើឲ្យក្រុមអ្នកគាំទ្រវិស័យកញ្ញាឯកនៅកម្ពុជាតាមសង្កេតមើលមិនដាច់ ខណៈដែលមុននេះពួកគេបានបង្កើតឲ្យមានការចាប់អារម្មណ៍ខ្លាំងសម្រាប់ទស្សនិកជន ។
អ្វីដែលជាការកត់សម្គាល់ផងដែរនោះគឺពួគគេបានបំពេញក្តីស្រមៃក្នុងការក្លាយខ្លួនជាបេក្ខភាពតំណាងឲ្យកម្ពុជាចូលរួមប្រកួតក្នុងលើឆាកអន្តរជាតិទាំងវ័យក្មេង និងប្រកបដោយទំនុកចិត្ត ហើយពេលនេះមិនត្រឹមតែអាចបំពេញក្តីស្រមៃក្នុងការក្លាយជាបេក្ខភាពតំណាងកម្ពុជា ទេ ពួកគេអាចសាងប្រវត្តិសាស្ត្រក្នុងការក្លាយជាម្ចាស់ជ័យលាភី និងនាំយកនូវសិល្បៈវប្បធម៌ជាតិបង្ហាញលើឆាកអន្តរជាតិថែមទៀតផង ៕
