ភ្នំពេញ ៖ បវរកញ្ញាកម្ពុជា តំណាងអោយកម្ពុជា ពេជ្រ វត្តីសារ៉ាវឌ្ឍី នៅតែខ្លាំង ពោលគឺនាងនៅតែរក្សាបានកេរ តិ៍ឈ្មោះ ភាពល្បីល្បាញ ជាពិសេសនៅតែមានទីផ្សារការងារទាំងក្នុងទាំងក្រៅប្រទេស ជាក់ស្តែងថ្មីនេះ នាងត្រូវបានខាងថៃ អញ្ចេីញទៅធ្វេី ជាពិធីការនី ក្នុងកម្មវិធីដ៏ធំមួយនៅ ប្រទេសថៃ។
ជឿជាក់ថាទស្សនិកជនប្រាកដជាបានដឹងច្បាស់ រយៈពេល១ ឆ្នាំនៃការកាន់កាប់តំណែង 5thRunner up Miss Grand International 2022 របស់ ពេជ្រ វត្តីសារ៉ាវឌ្ឍី បានបញ្ចប់ទៅហើយ ប៉ុន្តែបវរកញ្ញាកម្ពុជារូបនេះនៅតែ ដិតដាមជាប់ក្នងអារម្មណ៍របស់ហ្វេនៗជានិច្ចតទៅ។ផ្ទុយស្រឡះពីអ្វីដែលហ្វេនមួយចំនួនធ្លាប់បានលើកឡើងថា ទីផ្សាររបស់ វត្តី អាចនឹងធ្លាក់ចុះមកវិញពេលនាងផ្ទេរតំណែងរួចរាល់ តែជាក់ស្តែងពេលនេះគេសង្កេតឃើញថា ទីផ្សារការងារសិល្បៈរបស់កូនអ្នកខេត្តព្រះសីហនុរូបនេះនៅតែស្ទុះឡើងខ្ពស់ទាំងនៅក្នុង និងក្រៅប្រទេស ពិសេសគឺថៃតែម្តង។
តួយ៉ាងថ្មីៗនេះគេទើបទទួលដំណឹងថា កញ្ញា ពេជ្រ វត្តីសារ៉ាវឌ្ឍី នឹងត្រូវធ្វើដំណើរទៅកាន់ប្រទេសថៃ នាពេលឆាប់ៗនេះ ដើម្បីចូលក្នុងកម្មវិធីដ៏ធំមួយរបស់លោកស្រី Morphine Anda ម្ចាស់ Miss Grand ក្រុងថេប និង សារៈបុរី ។
ហ្វេនៗរបស់បវរកញ្ញារាងខ្ពស់ស្រឡះនេះ ពិតជារំភើបចិត្តខ្លាំងណាស់ ពេលដឹងថា វត្តី មិនមែនទៅចូលរួមក្នុងនាមជាភ្ញៀវកិត្តយសនោះទេ ប៉ុន្តែនាងនឹងទៅចូលរួមធ្វើជាពិធីការិនីជាមួយ P’champ នៅក្នុងកម្មវិធីស្វាគមន៍បវរកញ្ញា Top10 Miss Grand International 2023 ដែលប្រារព្ធធ្វើដោយអ្នកស្រី Morphine Anda ម្ចាស់ Miss Grand ក្រុង ថេប និង សារៈបុរី នៅប្រទេសថៃ នៅថ្ងៃទី១៤ ខែវិច្ឆិកា ឆ្នាំ២០២៣ ខាងមុខនេះ ៕
